O Sindicato Labrego Galego quere responder á campaña publicitaria pagada en varios medios de comunicación por Leite Río demostrando que, unha vez máis, esta industria láctea mente ao afirmar que non baixou o prezo do leite de xaneiro de 2012. E para iso achegamos con este comunicado recibos de explotacións nos que se poden comparar os prezos pagados en decembro de 2011 e os abonados en xaneiro de 2012, e nos que ser reflicte a baixada de 1 céntimo por litro.
Para o SLG, Leite Río é un claro exemplo das industrias que temos neste país, obsesionadas por obter o máximo lucro a costa das rendas das explotacións leiteiras que lles venden o leite coa complicidade do Ministerio de Agricultura e da Consellaría de Medio Rural. Esta actitude política e empresarial contrasta coa doutras zonas máis avanzadas da Unión Europea. Sen ir máis lonxe, hoxe coñecíase a nova de que a Interprofesional láctea da Bretaña e do País de Loira (Cilouest) vén de fixar un prezo de referencia de 32’93 céntimos para marzo de 20121.
No actual contexto de escalada dos custes de produción (gasóleo, abonos, forraxes, electricidade, etc.), e cunha seca que, de persistir, causará perdas millonarias; a actitude de certas industrias como Leite Río afondan na situación crítica na que se está afundindo o sector lácteo galego. Esta situación vaise agudizar aínda máis por mor de medidas políticas manifestamente erróneas, como a de obrigar a asinar contratos entre industrias e explotacións sen que haxa un prezo mínimo de referencia e, por riba, sen que a Unión Europea obrigue a facelo, pois depende da vontade de cada estado membro.
Deja un comentario