O Sindicato Unións Agrarias valora en positivo o acordo asinado pola Xunta de Galicia e as entidades financeiras para o adianto dos ingresos que lles corresponden ós gandeiros pola aplicación da PAC.

Esta medida, que pretende poñer á disposición xa das explotacións uns 70 millóns dos que xa son preceptores, só será efectiva dependendo da axilidade dunha tramitación que polo que vai coñecendo é engorrosa, dada a excepcionalidade que está a vivir un sector que como o lácteo leva máis de cinco meses tendo que vender a súa produción moi por debaixo dos custos de explotación.

Un escenario do que foi informado o conselleiro do Medio Rural, Samuel Juárez, o pasado 27 de maio, en que tivo lugar a reunión da Mesa do Leite. Nesa xuntanza tamén se lle trasladou á Xunta a necesidade de que os créditos do Igape sexan avalados pola propia Consellería para que as explotacións se poidan dotar de fondos para o circulante da súa actividade e non se atopen con atrancos para poder acceder ós préstamos nun momento no que as entidades financeiras son remisas ás operacións crediticias.

Así mesmo, por parte da organización agraria esíxese que se suavicen as condicións dos préstamos contraídos polos gandeiros para mellorar as explotacións tanto no tocante ó tipo de interese aplicable como á cadencia destes. E tamén nos que tiveron por obxecto a compra de cota, xa que supón, segundo Roberto García, secretario xeral de Unións Agrarias, “unha discriminación e unha eiva competitiva cos gandeiros franceses, que tiveron necesidade de compra de cota, e cos asturianos, que van dispor dunha axuda directa que cubra estes investimentos”.

Finalmente, Unións Agrarias lembra que este paquete de medidas, con ser importante, precisa dunha acción global das administracións para que o sector poida sobrevivir ás prácticas monopolísticas e depredatorias da distribución, que están levando á ruína a todo o sector produtor lácteo e, por extensión, tamén ás industrias.