Unións Agrarias manifesta a perplexidade que lle produce as presas do ministro de Agricultura, Arias Cañete por aprobar no Consello de Ministros de mañá as posta en marcha dos contratos obrigatorios para o sector lácteo cando aínda non se coñece o prezo ao que se vai a pagar o leite de setembro.
Todo apunta a que desde o Goberno se aposta pola política de prezos de miseria para os produtores galegos con tal de que distribución e industria sigan mantendo os seus privilexios. Deste xeito, do anunciado hoxe polo ministro non hai ningunha referencia a figura do mediador, clave para igualar a capacidade de negociación no mercado do leite. Tampouco nada se menciona dos mecanismos previsto por Xunta de Galicia e Ministerio de Agricultura para poñer fin a mecánica de “venta a perdas” que a distribución francesa leva perpetrando con total impunidade para afogar ao sector produtor galego e quedarse con tada a cota de mercado.
Neste sentido, o ministro de Mariano Rajoy parece descoñecer as estatísticas do propio FEGA, dependente do seu departamento, nas que se destaca a fonda recesión que están a sufrir os produtores lácteos de Galicia. Uns datos nos que queda de manifesto que mentres que en varias comunidades como Cataluña, Rioxa ou Cantabria remontan os prezos do leite pagado en orixe, na nosa Comunidade sigue instalada a tendencia baixista cunha nova perda de case medio céntimo por litro. Galicia queda pois condenada ao vagón de cola cunhas cotizacións para o mes de xuño de 0,28 cts cada vez máis lonxanas dos 3 cts por litro que superan o resto das comunidades.
UUAA esixe a posta en marcha dunha actuación inmediata por parte do Goberno, para salvar o sector lácteo galego do peche xeral de explotacións gandeiras ao que parece abocado de seguir a actual tendencia de caída de prezos do leite e subas especulativas dos medios de produción. Por iso ten convocada unha gran mobilización o vindeiro día 4 de outubro en Santiago de Compostela para denunciar a agonía que están a pasar as comarcas leiteiras de Galicia polas ansias monopolisticas da distribución e industrias e a falta de compromiso do sector do goberno de Nuñez Feijoo.
A gandería de leite precisa un plan de choque en Galicia para frear esta sangría económica no que ten un papel importante que se abran a máis empresas as investigacións da Comisión Nacional da Competencia polas prácticas monopolísticas nas que incorren industrias pola concertación de prezos e rutas de recollida.
Deja un comentario