A Plataforma para a Defensa do Sector Lácteo reunida en Santiago de Compostela acordou iniciar un calendario de mobilización a partir do día 30 de novembro no caso de que os produtores non vexan repercutir nas súas liquidacións os incrementos que a distribución si xa trasladou aos consumidores.
Na citada reunión púxose de manifesto que a día de hoxe nada ten cambiado case dous meses despois da sinatura do acordo –ao que Unións Agrarias non se sumou por non recoller garantías para cumprir os compromisos que recollía- polo que se insta tanto a Xunta de Galicia como ao Ministerio de Agricultura que fagan uso das competencias das que dispoñen para levar a realidade os compromisos anunciados con toda a “trompetería mediática” posible.
Previo as mobilizacións farase un último intento de acordo coas cadeas de distribución ás que se lle remitirá un escrito da Plataforma na que se lles informa de que se atopan en franco incumprimento do texto asinado, dándolle prazo ata o 30 de novembro para corrixir a actitude e trasladar ás industrias o incremento de prezos dos lineais.
Desde esa data, de non ter resposta, iniciarase unha campaña de boicot continuo e indiscriminado ás superficies comerciais e centros de distribución que persistan na súa actitude obstrucionista.
Desde UUAA reclámase a máxima solidaridade dos consumidores para rexeitar mercar naqueles establecementos que trafiquen co esforzos e o futuro das 9.000 familias que aínda resisten no sector lácteo galego.
Deja un comentario