As organizacións agrarias Asaja Galicia, Sindicato Labrego e Unións Agrarias poderán manter finalmente unha reunión con Medio Rural, logo de tres meses de tela solicitado, para tratar de atopar solucións a caída en picado que está a sufrir o prezo en orixe do leite en Galicia.

O encontro, previsto para o vindeiro xoves 4 de xuño as 17.30 horas na sede da Consellería, deberá servir en primeiro lugar, para coñecer os resultados das investigacións que a Xunta debeu iniciar a raíz das denuncias presentadas polas organizacións agrarias contra das prácticas abusivas nos contratos de aprovisionamento que os primeiros compradores trasladan as explotacións. Dos documentos aportados tanto ao departamento de Rosa Quintana como a AICA, (Axencia de Información e Control Alimentario) dependente do Ministerio, desprendese a total irresponsabilidade na que están situados os “empresarios” que especulan co futuro dun sector que é puntal do medio rural galego. Así nalgunhas das liquidacións que se lle trasladan as granxas aparecen prezos de venta de 2 ou 3 céntimos por litro de leite.

Neste sentido desde as organizacións agrarias esíxese, a súa anulación e reubicación a prezo de mercado en industrias transformadoras dos produtores que teñen contratos lácteos fraudulentos polas imposicións en prezo e volumes de recollida de determinados primeiros compradores. Nestes documentos cifrábanse tamén ofertas fora de prezo de mercado nun abano que vai dos 18 aos 25 cts/l. Do meso xeito, acompañouse á citada documentación, liquidacións de venda nas que se penalizaba de xeito totalmente ilegal, as granxas que decidiran cambiar de empresa.

O sector produtor vaille trasladar a Medio Rural a súa preocupación pola impresentable política de banalización do prezo do leite que grandes superficies como Gadis e Familia están a desenvolver nos últimos meses. Actuacións que son plenamente perseguibles pola Administración por tratarse de venta a perdas. Finalmente as organizacións agrarias poñerán sobre a mesa a distorsión que se está producir nos volumes de produción dependendo das comunidades autónomas; así mentres que en Galicia se está a forzar unha rebaixa nas cantidades de leite que se entrega as industrias, noutras zonas como Castela e León, se está fomentar o incremento de produción en sintonía co novo escenario xa sen cotas.