O Sindicato Labrego Galego expresa a súa frontal oposición ás Directrices Ordenación do Territorio (DOT) aprobadas provisionalmente polo Consello da Xunta de Galiza, o 16 de decembro, por supor unha agresión en toda regra á Galiza labrega e rural. Para o SLG, non se pode planificar o futuro de Galiza sen ter en conta ao sector agrario e o seu cometido fundamental: producir alimentos para a xente. Nembargante, as DOT que promove o Goberno da Xunta marxinan aos sectores agropecuarios e esquécense de definir o papel que ten que xogar o medio rural.
Así, propónsenos unha nova Galiza urbana e centralizada, cunha estrutura piramidal e xerarquizada. Estas directrices procuran concentrar á poboación nas grandes áreas, e potencian a desaparición das parroquias, das comarcas naturais e dos pequenos núcleos. Como consecuencia, tamén desaparecerán os servizos que se prestan á poboación dende a proximidade, tanto para as explotacións como para as persoas. Con todo isto, tamén se darán por desaparecidas as actividades primarias ligadas ao territorio. Ademais, concentrar a poboación e os servizos nos grandes núcleos levará a crear cidadáns e cidadás de primeira, segunda, terceira ou cuarta categoría segundo vivan, respectivamente, nun espazo metropolitano (Coruña e Vigo), nas tres grandes cidades restantes (Lugo, Ourense e Santiago), nun sistema urbano intermedio, ou fóra destes espazos.
Ocio, turismo, minería e enerxía en troques de agricultura e gandería
Semella que as Directrices de Ordenación do Territorio queren deixar o medio rural coma un espazo para actividades que teñan que ver co ocio, o turismo, a minería e a produción de enerxía; e non coa produción de alimentos. As DOT refírense ás actividades produtivas da agricultura e da gandería dicindo que a Xunta realizará estudos para identificar as zonas con maior valor agrolóxico; o problema é que serán os planeamentos urbanísticos de cada Concello os que definan os usos agrarios e gandeiros das zonas con maior produtividade. Deste xeito, queda claro que, neste novo deseño de País, dáse por desaparecida a actividade agraria ao non reservarse espazos para esta fin, nin deseñarse un plan sectorial para o seu desenvolvemento.
Alegacións contra as DOT pedindo a súa retirada
Fronte a estas DOT, o Sindicato Labrego Galego aposta polo dereito dos labregos e labregas a ocupar un espazo; a ter un futuro coa súa profesión que lles permita producir e vivir do seu traballo; e a xogar un papel na conservación e defensa da calidade do territorio, da paisaxe e do medio ambiente. O SLG loitará polo mantemento dos postos de traballo na agricultura, poñendo freo ao actual proceso de desaparición da explotación agraria familiar.
Por todo isto, o SLG xa presentou unha batería de alegacións pedindo a retirada destas DOT, e reclamando que se retome como base de traballo para a súa redacción o Plan de Comarcalización de Galiza; que manteñan a superficie agraria útil, mellorándoa até acadar polo menos un terzo da superficie total do territorio; e que garantan os servizos públicos de proximidade existentes no rural, fixando as bases para traballar na súa mellora.
Deja un comentario