Tal e como anunciara, o Sindicato Labrego Galego convoca unha tractorada para hoxe, 30 de novembro, en Xinzo de Limia para esixir do Ministerio de Agricultura un gasóleo agrícola profesional que non estea lastrado cos abusivos impostos que o gravan. Esta medida de forza lévase a cabo ante a incapacidade do Ministerio de Agricultura de ofrecer solucións a un problema estrutural que ameaza a viabilidade económica de miles de explotacións en todo o Estado. O programa de mobilizacións comezará ás 10:00 horas, cunha concentración de tractores na Praza do Toural de Xinzo, seguida dunha tractorada polas rúas da vila a partir das 12:00 horas.

O Sindicato Labrego Galego elixiu A Limia para manifestarse por ser esta unha das bisbarras máis afectadas de Galiza polo incremento constante dos carburantes. Isto débese á alta mecanización que esixen os cultivos de patacas e cereais.

Segundo os cálculos feitos por técnicos do SLG, unha explotación media n’A Limia gastaba 2.847 euros en gasóleo ao ano en 1999, e gasta agora, no 2005, 6.429 euros facendo o mesmo traballo, o que supón un incremento só en gasto de carburante de 3.582 euros (case 600.000 pesetas). E iso nun contexto no que o prezo da pataca e dos cereais están estancados ou á baixa, e no que tamén subiron outros insumos coma os fertilizantes.

O Sindicato Labrego Galego, xunto coa Coordinadora de Organizacións Agrarias e Gandeiras (COAG), vén esixindo dende hai anos a creación dun gasóleo agrícola profesional que non estea lastrado cos impostos abusivos que o gravan. Cómpre ter en conta que, dos 70 céntimos que custa hoxe un litro de gasóleo agrícola, case 20 céntimos son de taxas, das cales as máis importantes son o 16% de IVE (11 céntimos), e o Imposto Especial de Hidrocarburos (8 céntimos).