Xóvenes Agricultores ven de solicitar do Ministerio de Agricultura que modifique a distribución de fondos para os pagamentos adicionais da prima láctea, establecidos no R.D. 543/2004, polo que se determinan axudas directas comunitarias ao sector lácteo para os anos 2004 a 2006. Os productores lácteos galegos recibiron por este concepto 6.326.316 euros no ano 2004 e 12.683.673 euros no ano 2005. Dacordo coa disposición derradeira terceira do citado R.D., para 2006 o Ministerio debería modificar o importe establecido para Galicia, cifrado en 19.025.510 euros.

O motivo da variación solicitada por Xóvenes Agricultores é que os productores galegos aumentaron a súa cota de leite en 171.288 Tm., e polo tanto débelles corresponder un incremento na prima láctea adicional de 2.900.000 euros no ano 2006. Xóvenes Agricultores considera de suma importancia para o sector lácteo galego que se faga esta rectificación, por canto o pago establecido para o ano 2006 terá vixencia ata o ano 2012, o que suporía un incremento de 20.300.000 euros en concepto de prima láctea adicional para Galicia.

No decurso dunha xuntanza celebrada hoxe en Santiago de Compostela Xóvenes Agricultores ofreceu o seu apoio á Consellería de Medio Rural na reclamación que diante do Ministerio fixo das devanditas cantidades. Non obstante a nosa organización fíxolle ver á Consellería o seu desacordo cos seus criterios de reparto da prima. Xóvenes Agricultores defende un reparto en función da cota que cada gandeiro posua, como se fixo ata agora,.

Para a nosa organización, é moito más importante conseguir a revisión do montante global que lle corresponde a Galicia polo incremento da cota dos nosos productores, que as distintas posibilidades de criterios a establecer. As primas lácteas foron aprobadas para compensa-la caída dos prezos na U.E., polo que Xóvenes Agricultores denuncia ademais que as explotacións galegas veñen cobrando o leite sempre por debaixo dos prezos no resto do Estado. A situación agravaráse aínda máis a partir de xaneiro, habida conta de que a industria está comunicando estes días ós gandeiros unha rebaixa de 5 pesetas en litro, polo que Xóvenes Agricultores vai solicitar unha convocatoria urxente da Mesa do Leite.