XXAA: Asaja protesta contra a suba de prezos dos fertilizantes

Xóvenes Agricultores quere amosar a súa máis enérxica protesta contra a asfixiante suba do prezo dos fertilizantes, un dos principais custos de produción das explotacións agrícolas. Precisamente estes días coñeceuse a decisión de Fertiberia, compañía líder nun sector que funciona en réxime de monopolio, de encarecer para a próxima campaña agrícola en máis dun 33 % algúns dos fertilizantes mais demandados. Este incremento resulta disparatado e completamente inasumible para o sector, máis se se ten en conta que estes produtos non deixaron de encarecerse nos últimos anos.

Segundo os cálculos do Departamento de Estudios e Informes de Xóvenes Agricultores, en Galicia se consumen entre 100 e 110 toneladas de fertilizantes ao ano, o que supón unha facturación duns 25 millóns de euros por parte deste sector, aos que habería que engadir outros 1,5 millóns de euros en abonos especiais.

ASAJA considera fundamental actuar con rapidez e responder ao envite das compañías de fertilizantes, xa que é agora cando comeza a entrar no noso país o produto que se utilizará a próxima campaña agrícola, a partir de outono. A multinacional Fertiberia controla un terzo destes fertilizantes complexos, mentres que o resto distribúeno outras tres empresas (Inabonos, de Pamplona, Fertilizantes de Teruel, e Mirat, de Salamanca), aínda que funcionan na práctica como un monopolio, posto que a todos interésalles elevar prezos.

Aínda que o seu argumento é que subiu o prezo dos compoñentes que precisan para producir os abonos, o certo é que aproveitaron a situación para inflalo artificialmente. Fertiberia, que actualmente cotiza en Bolsa en Estados Unidos, está especialmente interesada nestas subidas, xa que iso anima ós seus inversores.

A situación complícase máis se se ten en conta o feito de que o sector dos fertilizantes goza prácticamente de impunidade, e que ata agora ningún goberno enfrontouse a iso. Baste recordar que o Consello de Ministros da UE aprobou no mes de decembro de 2006 a prórroga das medidas antidumping practicadas desde o ano 2000, mediante as cales as importacións de urea e nitrato amónico procedentes de Alxeria, Rusia, Bielorrusia e Ucrania atópanse sometidas a dereitos arancelarios para compensar o menor custo de produción naqueles países.

Polo momento, cooperativas e almacenistas, principais intermediarios que adquiren e distribúen os fertilizantes, non están comprando o abono aos abusivos prezos marcados por Fertiberia, dado que consideran difícil que os agricultores poidan asumir eses custos.

Xóvenes Agricultores pide a cooperativas e almacenistas que sigan con esta postura e presionen, xunto ao sector agrícola, para frear esta situación, e propiciar a apertura de novos mercados que rompan o actual monopolio. Ao mesmo tempo, consideramos importante que o Goberno contribúa a terminar cunha situación de monopolio que, para beneficiar a conta de resultados das grandes compañías, está arruinando aos agricultores.

Santiago, 11 de maio de 2007