Ribadeo (Lugo), 16 de maio de 2007.- A Consellería de Pesca e Asuntos Marítimos fixo hoxe entrega de 30.000 unidades de ameixa babosa á Confraría de Pescadores de Ribadeo que serán sementadas na Praia de Vilavella o vindeiro sábado, día 19. Con esta actuación, o departamento que dirixe Carmen Gallego pretende impulsar a rexeneración dos bancos marisqueiros desta zona costeira, permitindo así que as mariscadoras poidan aumentar os seus ingresos.
As unidades de ameixa babosa doadas proceden do minicriadoiro que Pesca posúe na localidade lucense de O Vicedo e teñen unha talla media de entre 10 e 15 milímetros, tamaño que garantirá a boa fixación da semente ao sustrato. Estes exemplares son o froito do novo sistema de preengorde que se instalou no centro de O Vicedo, hai unhas semanas, e que ten como obxectivo sacar unha semente de maior tamaño para así poder garantir unha maior fixación nos areais e unha menor mortandade.
Accións para a recuperación de zonas marisqueiras nas rías galegas
A Ría de Ribadeo, xunto con outras partes do litoral galego, estase a beneficiar de varias actuacións promovidas por Pesca encamiñadas a estudar a viabilidade de recuperar certas zonas marisqueiras onde hai problemas cos recursos. De feito, o pasado mes de febreiro a Consellería realizou unha doazón de 120.000 exemplares de ameixa xapónica á confraría ribadense destinadas a sementar nos seus bancos. Así mesmo, o pasado mes de outubro, o Centro de Investigacións Mariñas (CIMA), dependente da Consellería, realizou unha sementeira de 25.000 unidades de longueirón vello nesta Ría, unha iniciativa que se suma a dúas anteriores e que permitiu acadar os 250.000 exemplares cultivados.
O departamento que dirixe Carmen Gallego sementou tamén o ano pasado 1,3 millóns de unidades de ameixa babosa e 417.000 de ameixa xapónica na zona de Camariñas. Todas estas actuacións enmárcanse dentro dun programa de cultivo de moluscos bivalvos para recuperar os bancos marisqueiros, xa que a produción do sector vese limitada pola carencia dun sistema de suministro regular de semente.
Deja un comentario