Máis de 50 explotacións avícolas de Galicia ven o seu futuro moi comprometido logo do anuncio de cese de actividade da pranta integradora de aves Louriña en Mos, a cuarta por volume de produción. Este peche que xa foi comunicado o pasado 25 de marzo aos produtores vai supoñer que os preto de 6 millóns de polos que estas granxas crían, se queden sen posibilidade de ser transformados. Así, unhas 11.500 toneladas de carne de polo que non poderán saír a venda cunhas perdas estimadas para o conxunto dos 50 criadores de máis de 2 millóns de euros.
Dada a gravidade da situación, Javier López, presidente da Asociación de Criadores de Avícolas de Galicia, (ACRIAGA) dirixiulle unha carta a Conselleira de Medio Rural e Mar, Rosa Quintana para reclamar que convoque de forma urxente a produtores, industria e distribución para buscar solucións que eviten un peche en cadea en todo o sector.
Unións Agrarias esixe que no articulado da futura Lei de Calidade Alimentaria se estableza que entre os elementos dos contratos alimentarios se inclúa o prezo, que no caso de contratos referidos á produción primaria, en ningún caso será inferior ao custo de produción primaria vixente. E neste caso en concreto, para defender aos avicultores integrados, un sector altamente profesionalizado onde ferramentas coma os contratos de integración levan anos funcionando, cunha situación de incremento da demanda e que por mor de estratexias comerciais da distribución está en grave perigo.
Neste sentido, desde UUAA destacase o importante avance dado polo goberno francés para protección do seu sector avícola cun plan que contempla o apio a modernización das explotacións, a loita contra as distorsións da competencia, e a mellora das relacións contractuais coa industria a través dunha claúsula obrigatoria sobre a alzas voatilidade das materias primas.
As granxas de polos de Galicia supoñen o 13,47% das granxas de polo de España (un total de 5.085 explotacións. O 88% das explotacións e o 90% da capacidade total están en réxime de integración, é dicir, o avicultor encárgase da cría, garda e engorde dos poliños e a empresa integradora proporciona os poliños e o penso.
No ano 2011 sacrificáronse nos matadoiros de Galicia 67.954.840 broilers (variedade de polo destinada especificamente para carne) polos que se obtiveron 133.933,45 Tm de carne, resultando un peso medio de 1,97Kg/canal. Isto da unha media diaria de 186.177 cabezas sacrificadas e 366,94Tn en Galicia. O 98,83% da produción (132.369Tm) foi destinada a consumo directo e o 1,17% ( 1.564 Tm) a consumo industrial. Os broilers sacrificados en Galicia supoñen o 11,66% da produción de polo de España (un total de 1.148.389 Tm).
Deja un comentario