O sindicato Unións Agrarias denuncia a actitude irresponsable da Consellería de Medio Rural por non facer aínda públicas as axudas consignadas a mellora das explotacións previstas para este ano. Esta atraso por parte da Xunta supón un grave atranco para moitas explotacións en fase de modernización ou ampliación porque non poden fixar a partida de inversións ao descoñecer o grao de financiamento final ao que terán que enfrontarse.

Sorprende o desinterese de Medio Rural cando sabe que esta liña de axudas é a principal porta para a incorporación de xente nova ó agro así como para a modernización e redución de custes das explotacións. Para Unións Agrarias esta maneira de desentenderse da mellora da competitividade do medio rural por parte do goberno de Feijoo xa quedou patente no 2012 onde se denegaron o 50% dos plans de mellora e se reduciu nun 10% o importe subvencionado dos aprobados.

Do mesmo xeito, as limitacións debidas á exclusión das reformas, así como a imposibilidade de solicitar para a mesma inversión durante 5 anos, supón un importante obstáculo para a mellora das explotacións, que ven así imposible ampliar o número de animais ou incluso reducir os custos de produción debido a estas limitacións. O encaixonamento das axudas, está a provocar que moitos gandeiros desistan de facer inversións que supoñerían unha importante redución nos custos de produción, tales como silos, fosas de puríns, novas ampliacións de cortes, por telo solicitado nos últimos 5 anos.

Nos planas de melloras Xunta e Ministerio so aportan o 21% xa que o resto corresponde a financiamento europeo, polo que resulta inexplicable a actitude cicateira da Consellería que impide que chegue investimento ao medio rural galego. Hai que lembrar que as preto de 1.000 explotacións que se poden beneficiar anualmente destas axudas, deben investir nas melloras como mínimo o dobre da subvención recibida, un montante que vai a empresas do medio rural axudando a crear emprego.