A Xunta mantén as inspeccións e o rexistro dos danos do xabaril ata pasar as municipais pese a non dispoñer de orzamento

UUAA quere denunciar a actitude de engano cara os agricultores e gandeiros por parte da Consellería do Medio Rural, con respecto ao pago das axudas dos danos do xabaril pese a non dispoñer do orzamento necesario para afrontalas. Segundo os orzamentos da Consellería do Medio Rural, para o presente ano 2011, só figuran consignados 183.200 euros, concretamente no apartado ‘indemnización por danos’, cantidade que permitirá cubrir unicamente os desperfetos producidos polo lobo, que se cifran en torno a uns 160.000 euros ao ano. Pola contra, este orzamento non alcanzará para cubrir os danos producidos polo xabaril, dos que a Xunta viña documentando nas súas inspeccións, máis de 500.000 euros anuais en compromisos de pagos, a pesares do tope de 1.500 euros por explotación afectada.

Aínda que dende algúns Servizos Provinciais de Caza, responsables das inspeccións de campo dos danos da fauna salvaxe xa advertiran de que non se ían tramitar novos expedientes nin facer máis visitas de inspeccións, debido á falta de orzamento, UUAA observou un cambio de actitude na Consellería do Medio Rural, que pide que se manteñan as inspeccións alomenos ata pasadas as eleccións municipais de maio. Preténdese con esta medida reducir a crispación entre os gandeiros afectados, especialmente de cara ao inicio da campaña da sementeira do millo forraxeiro que coincidirá no mes de abril, que coincide coa véspera electoral. Ademais, cabe lembrar que se levan sen pagar os danos do xabaril dende mediados do ano 2009.

Segundo Jacobo Feijoo, secretario de Desenvolvemento Rural de UUAA, “de confirmarse estes extremos, ao abandono que supón a falta das axudas, engádese agora a burla a un colectivo ao que se lle está a terminar a paciencia con este tema”.

Galicia cultiva o 68% do millo forraxeiro de toda España, e dende UUAA estímase que alomenos un 10,5% da superficie deste cultivo anual se ve afectada polos ataques do xabaril, feito especialmente grave nun ano de suba dos custes de produción, e de encarecemento récord dos pensos animais, propiciado pola suba das materias primas nos mercados internacionais.