XX AA pidelle á Ministra Aguilar a mesma rapidez e determinación que o goberno francés para aprobar os contratos lácteos

Se o Goberno do Estado actuase como o Executivo francés, a organización profesional agraria Xóvenes Agricultores non tería máis remedio que felicitalo pola súa eficacia e efectividade na posta en marcha da obrigatoriedade dos contratos homologados de compra-venda de leite. En efecto, o Goberno galo ven de pór en marcha un decreto, que entrará en vigor o vindeiro mes de abril, no que se establece que a relación contractual será obrigatoria para o sector lácteo. A rapidez na tramitación deste decreto no veciño país contrasta coa lentitude e a falla de vontade política do departamento que dirixe Rosa Aguilar, para sacar dunha vez por todas unha normativa semellante en España.

O texto francés, ademáis, prioriza aos organismos interprofesionais para definir este marco contractual, sen enredar aínda máis a situación como está a pretender o Ministerio de Medio Ambiente, Medio Rural e Mariño ao falar das organizacións de produtores. Sen ambigüidades, o decreto de Francia fala de que os únicos axentes económicos implicados nesta normativa, de obrigada aplicación, son os produtores de leite e os seus compradores. XXAA entende que esa priorización debe pasar, en España, polo reforzamento da INLAC.

Aínda por riba, no texto galo fálase do establecemento dos criterios e referencias a ter en conta para a determinación do “prezo base”, con referencia á actual lexislación francesa ou dacordo con calquera outro indicador ou referencia pertinente, baixo a reserva de que as modalidades de determinación do prezo sexan obxecto dunha descripción detallada.

Logo da entrada en vigor do decreto galo, os gandeiros do veciño país serán informados antes do inicio de cada mes (por mes anticipado), do prezo base que será aplicado para as entregas do mes de referencia. No decreto establécese, tamén, un periodo mínimo de duración contractual, que se fixa en cinco anos. Todo un exemplo a seguir pola Administración española.

A posta en marcha da contratación obrigatoria en España faise cada vez máis necesaria e urxente, toda vez que a evolución dos prezos no noso país segue a ser máis baixa que no resto de nacións produtoras. Cómpre lembrar, neste senso, que no mes de novembro pasado aos gandeiros galegos pagáronselles 30,59 céntimos por litro, fronte aos 31 céntimos de media estatal e aos 33,2 céntimos de euro no conxunto da UE. Os produtores de Galicia cobran, así, tres céntimos menos que en Europa e os españois 2,5 céntimos menos. En Alemaña, por exemplo, os gandeiros reciben 34,7 céntimos de euro por litro, mentres que os produtores holandeses perciben 35,7 e os italianos 36,5 céntimos.