O Sindicato Labrego Galego quere saír ao paso das falsas acusacións vertidas por Xóvenes Agricultores nos medios de comunicación galegos que afirmaban que o SLG ten “acordos falsos con adegas” e que “está enganando aos profesionais galegos intentando convencelos de que xa pactaron prezos con algunhas adegas de Rías Baixas para a actual colleita”.

Dende o SLG queremos deixar ben claro que nunca presentamos contratos falsos, pois iso sería falsidade documental e está penado. Pola contra, o Sindicato Labrego Galego propiciou a semana pasada a sinatura de varios contratos subscritos entre viticultores e unha adega de Rías Baixas, e os prezos e condicións foron debidamente informados a ambas partes e con tódalas garantías xurídicas que establece o Código Civil no que respecta aos contratos de compra e venda. Os prezos acadados gracias a estes contratos responden á realidade comercial do sector e da estabilidade necesaria para productores e elaboradores, e foi considerado beneficioso para ambas partes.

Respecto á acusación de que estes acordos son “falsos”, os documentos asinados están aí, debidamente rexistrados, e á vista de quen os queira ver; namentres que as acusacións de Xóvenes Agricultores non son máis que mentiras verbais sen ningún tipo de fundamento nin base.

O Sindicato Labrego Galego lamenta as infames declaracións de Xóvenes Agricultores, un feito de delata a natureza desta organización patronal –Asaja está inscrita na Confederación Española de Organizacións Empresariais (CEOE)- que está a apoiar e defender, sobre todo, os intereses das empresas elaboradoras por riba dos intereses dos viticultores.

Non hai dúbida de que a intención de Xóvenes Agricultores é a de que exista o mínimo de información dirixida a viticultores para que estes entreguen a uva a menor prezo e beneficiar así certos intereses particulares. Nembargantes, esta posición non lle dá a Xóvenes Agricultores o dereito de difamar a outras organizacións agrarias que, como o SLG, traballan e loitan a prol dos intereses dos labregos e labregas da Galiza.

Emporiso, o SLG, ante as infundadas acusacións de Xóvenes Agricultores, reservase o dereito de emprender accións legais contra un evidente delicto por calumnias.