Cada tres anos, cada Federación ou Asociación rexional de cooperativas agroalimentarias recompila, mediante cuestionario, información social e económica das súas cooperativas asociadas co fin de actualizar os datos do Observatorio Socioeconómico do Cooperativismo Agroalimentario Español coordinado por Cooperativas Agro-alimentarias de España e financiado polo Ministerio de Agricultura, Alimentación e Medio Ambiente. O último informe fai referencia ao exercicio 2011.

Hai poucos días, na Asemblea Xeral de Cooperativas Agro-alimentarias de España, fixéronse públicos algúns datos do último informe. Nel inclúense os datos de identificación, contacto, facturación, emprego socios e actividades sectoriais. A información crúzase ademais con datos do Ministerio de Emprego.

Destacamos os máis relevantes, a nivel de cooperativas de Galicia:

Cooperativas

Segundo o Ministerio de Emprego e Seguridade Social, as cooperativas agrarias en España —incluíndo as de explotación comunitaria da terra— son 3.861. En Galicia, contabilízanse 215 (suman todas as dadas de alta na Seguridade Social, aínda que non teñan actividade). Deste total, o 63% forma parte de AGACA.

A tendencia en canto a número de cooperativas —dende 2006 ata 2011— reflicte unha diminución dun 7%, producíndose unha curva descendente a partir do ano 2008. Porén, o número de socios contabilizado entre 2007 e 2011, subiu nun 19,8%.

Facturación

A facturación en Galicia evidencia un incremento dun 13,9% dende 2006, que se volve decrecente a partir de 2008, xusto no ano en que comeza da crise no sector gandeiro, mentres que no resto de España o comportamento resulta alcista en todo momento.

Este peor comportamento débese á especial dureza con que a crise incidiu nos sectores gandeiros de leite e carne, que contan cun gran peso proporcional na nosa Comunidade Autónoma.
É necesario ter en conta que só o 5% das cooperativas desenvolven actividade exportadora, principalmente, procedentes do sector do viño.

A facturación directa do cooperativo agroalimentario galego supón un 63% do valor da produción final agraria galega, segundo recolle o Anuario de Estatística 2011 da Consellería do Medio Rural e o 1,7% do valor da produción bruta da Industria Alimentaria Española, segundo a Federación Española de Industrias de la Alimentación y Bebidas (FIAB).

Por sectores, os de máis facturación son leite, alimentación animal e gandería, seguida de subministros, servizos, viño e tendas. A ampla maioría das cooperativas, o 74% ofrecen servizos ós seus socios, o 53% ofrecen fertilizantes, o 52% conta con tenda agraria e o 48% ten actividade en leite de vaca cru.

Emprego

No relativo ó emprego total (fixos máis eventuais) constátase que, entre 2007 e 2011, as cooperativas (de 1º e 2º) incrementaron nun 11,87% os postos de traballo creados, situándose o incremento no Estado nun 6,7%.